به به گینه آغ ، گوی ، قره تسبیحلر اوزاندی ماه رمضاندی


آددیم باشی ، قرآندی مناجاتدی اذاندی ماه رمضاندی


صفلر گینه دولدی عزیز اولدی مساجد اولدی هامی عابد


یوخ بخل و حسادت داخی چوخ یاخشی زماندی ماه رمضاندی


ملّت هره قویموش جیبینه بیر بالا بطری افشان ائدیر عطری


بازار و خیابان دیه سن باغ جناندی ماه رمضاندی


قرآنی اوخور دیلده ولی قانموری تجوید نه مدّ و نه تشدید


آنجاق که دئسونلر آقا قرآن اوخویاندی ماه رمضاندی


دولتلی که مسجدده گلوب صفده دورانماز شئهدور اوتورانماز !


بیچاره کومیرچی ، کوزه چی ، خرما ساتاندی ماه رمضاندی


* البته این خرما فروش بیچاره مال ایّام قدیم بود الان همه میدونن که خرما فروشان ..... آره !!


تک بو آیا ( ماه ) مخصوصیدی آیا ؟ بو عبادت آی ..... جماعت


آی پوللی جماعت (خودتونو خیلی در گیر نکنین ما بنارو رو کلمه پوللی گذاشتیم دیگه )


مسجد بابا هر آیدا مسلملنه مکاندی ماه رمضاندی


گلمزله بولار مسجده الّا رمضاندا بیرده یول آزاندا


بیر آیدا ماشاءالله کیشی هر مطلبی قاندی ماه رمضاندی


ای کاش گله مسجده دائم بو جماعت از روی دیانت


افسوس بیر آیلیقدی بو طاعت قوتولائدی ماه رمضاندی


افطاریدی بعضیلرینون قلبی دویوندی بیر عدّه سوویندی


بیر یاندا بهار آی بالا بی یاندا خزاندی ماه رمضاندی


بیر یاندا پیشیر پخله ، پلو ، دولما ، بادمجان هم قیمه فسنجان


کلفت چاغیرور آشپزی قیز گل کوکو یاندی ماه رمضاندی


بیر سفرده اون جوردی خوروش میل ائلین یوخ اسراف ائلین چوخ


بال قیماقی گورجک خانمون گویلی بولاندی ماه رمضاندی


بیر سفرده بیر سنگک ایکی کاسه یاوان آش دورین آلوب او باش *

* خانواده ی پر جمعیت


از بس قاپا قاپ سالدیلا آشلاردا جالاندی ماه رمضاندی


بیر یاندا بش آلتی باشا بیر خردا سماور نه قند و نه شکّر


افطاریدی بیر قاش پنیری یوخدی یاواندی ماه رمضاندی


چون ماه مبارکدی گوزون اوت داخی اَتدن خیر و برکتدن



دوشدی قاچاقا سود ، کره ، قیماق باهالاندی ماه رمضاندی


بیر عدّه خیاباندا سالوب قول قولا باهم هم عیشی فراهم


گر گولسه ، ساتاشما عمو ، باش وئرمه جواندی ماه رمضاندی


بعضی اوتوروب آغزین آچوب قهوه ده نقله احسن بئله عقله


هئچ قانموری ایندی خانم ائوده نگراندی ماه رمضاندی

ماه رمضان روحه صفا قلبه شفادی هر درده دوادی


ماه رمضان رحمته غفرانه ضماندی ماه رمضاندی


الله قاپوسیندان هارا قاچسان گله جاقسان آخر ئوله جاقسان


بیر گون گوره جاقسان جسدون قبره اوزاندی ماه رمضاندی